Kamala Harris, Premye Fanm Vis-Prezidan Ki Gen Sekrè Kòd Nikleyè Etazini

Prezidan Joe Biden transfere pouvwa li pou yon ti bout tan bay Vis-Prezidan Kamala Harris paske li ta pral fè yon chèkòp koloskopi nan yon lopital militè Ozetazini, vandredi 19 novanm 2021 an. Vis Prezidan Kamala Harris se premye fanm Ameriken ki gen sekrè kòd pou deklanche asenal nikleyè a si toufwa pi gran puisans mondyal la ta anba yon atak atomaik yon peyi enemi.

Yo kreye kòd nikleyè pou premye sitwayen ameriken an kapab gen aksè ak li tout kote li pase. Se sèlman kòd pa prezidan an ki toujou aktivite. Men sa vis-prezidan genyen an aktive sèlman si Prezidan an difikilte. Yo te aktive kòd nokleyè Vis Prezidan Kamala Harris la vandredi 19 novanm nan pou yon ti bout tan.

Madam Harris se premye fanm ki rive vis prezidan Ozetazini e li soti nan yon fanmi imigran. Li se yon fanm nwa ki gen yon diplòm inivèsite an dwa. Papa l sete yon Jamayiken e manman l yon endyèn.

Eske Ayiti ak Sendomeng nan Menm Panye Ensekirite?

Pale anpil sou sekirite nan peyi Dayiti ak Sendomeng te kòmanse konsa:

Lendi 1 novanm 2021 an, Prezidan Dominiken an, Luis Abinader, ki gen lè tap gade Ayiti nan telefòn entèlijan li monte sou entènèt kote li di kominote entènasyonal la, “Tanpri souple mezanmi pote Ayiti sekou.” Lidè peyi panyòl la adrese mesaj li ak Nasyon Zini, Etazini, Kanada, Lafrans, Inyon Ewopeyèn ki di yo se zanmi premye nasyon nèg nwa ki te pran endepandans nan Karayib la, kote li di yo, aji vit pou ede Ayiti jwenn yon bout tou suit anba enstabilite politik la travèse a, kote gang ame se sèl kòk chante nan tout rakwen l. Prezidan Abinader di Ayiti se yon pwoblèm akoz ensekirite li gen lakay li.

Deklarasyon Prezidan Abinader la ta pral frape nan pòt kaye diplomatik minis afè etranjè gouvènman defakto yon sèt tèt Ayiti a Premeye minis Ariel Henry ap dirije a, Dr. Claude Joseph, ki pat pèdi tan pou reponn prezidan panyòl la. Minis Joseph raple Prezdian Abinader ke Sendomeng soufri menm maladi ensekirite ak Ayiti. Minis Claude site rapò Depatmen Deta Ameriken ki klase Sendomeng nan kategori 3, alèt sou sekirite akoz ogmantasyon zak kriminèl yo anrejistre sè denye tan. Ayiti klase nan katekori 4. E pèsòn pa etone! Minis Joseph di menm jan li pa pòt pawòl zile a Prezidan Abinader paka pale nan vwa 2 pèp yo ansanm. Li ajoute okontrè 2 peyi yo dwe travay ansanm pou kreye yon klima sekirite sou tout zile a.

Sepandan dapre Anbasad Etazini nan Sendomeng, avètisman vwayaj chèf diplomasi ayisyèn nan ap pale a pa gen anyen pou wè ak krim nan peyi panyòl vwazen Ayiti a, Sendomeng, men pito ak maladi Kovid 19 la. Konsil jeneral dominiken an nan Wanament Jose Valenzuela ki tap reyaji di deklarasyon chanselye ayisyen an Claude Joseph manke savè diplomatik. Paske Prezidan Dominiken an Luis Abinader te vle sèlman sone sonèt dalam la pou l di gwo zanmi Ayiti yo prese prese vit vin ede nasyon sa a soti nan kriz sa li ye jodi a. Li ajoute, se pa sèl Sendomeng, se tout peyi nan rejyon an kap rele anmwe sekou pou Ayiti rejwenn trankilite ak lapè.

Toutfwa, kòmantè nan medya yo ann Ayiti pa ale an favè chanselye ayisyen an Dr. Claude Joseph menm si se Ayiti li te vle defann. Dayè, se djòb li. Jounalis Daly Valet ki tap reyaji sou Twitter fè konnen Minis Joseph pèdi larezon. Li di fòk ou ta gen otas anpil pou mete Ayiti ak Sendomeng nan men panye ensekirite. Ann Ayiti, gen yon leta fèb ki ajenou. An repiblik Dominikèn ensekirite a mezire e leta debou e li kanpe janm. Lòt nouvèl fè kwè, lame dominikèn deplwaye 11 mil sòlda sou fontyè li pataje ak Ayiti yon fason pou viris ensekirite kap ravaje ayisyen yo pa travèse fontyè.

Biwo Jij Orélien Sakaje. Ki Enpak Zak sa a Genyen sou Ankèt Lap Mennen sou Asasina Prezidan Moise la?

Endividi moun pa rive idantifye sakaje epi vandalize biwo Jij Garry Orélien kap mennen ankèt sou asasina Prezidan Jovenel Moise la. Kòfrefò kraze, dosye gaye e ta menm disparèt. Biwo grefye Pakè Pòtoprens la sibi menm domaj la. Poulemoman otorite jidisyè yo ak lapolis ap evalye dega yo e mennen ankèt sou sak pase a.

Vandalizsyon biwo Jij Orélien an nan lannuit 27 pou rive 28 oktòb 2021 an kapab rann li pi difisil pou ankèt la kontiney kòmsadwa e menm enposib si toutfwa ta gen dosye enpòtan ki disparèt. Sepandan, otorite yo poko bay bilan sou zak sa a. Yon semèn avan, endividi moun pat rive idantifye te tire epi andomaje machin Jij Orélien nan zòn Delmas 95.

Prezidan Jovenel Moise mouri asasine lakay li nan lannuit 6 ak 7 jiyè 2021 pase a nan Pèleren 5. Lapolis ann Ayiti yon jou apre asasina Prezidan Moise la te arete anviwon 17 sitwayen kolonbye ak 2 ayisyen ameriken yon rann responsab sak la. Prezidan Jovenel Moise se sèl viktim mòtèl nan atak la ak mandanm li Martine Moise ki te soti blese. Ajan polis espesyal ki te la pou asire sekirite koup prezidansyèl la te kraze rak senn e sof.

DCPJ ak apui FBI te konplete premye pati nan ankèt la epi voye dosye a nan pakèt pou suit legal. Jij Garry Orélien se dènye majistra ou jij denstriksyon ki aksepte mennen ankèt sou asasina lidè PHTK a. Lòt majistra ann avan Pakè Pòtoprens te kontakte pou kontinye ankèt la te derefize akoz rezon sekirite.

Etazini Pwomèt Lapolis ann Ayiti Apui l nan Jefò pou Sekirize Kamyon Livrezon Gaz yo

Lézetazini montre li konsène de sitiaysyon sekirite a ann Ayiti kote gang ame rann li enposib pou kamyon gaz al fè livrezon atravè peyi a. Sitiyasyon sa a lakok yon rate gaz sou mache a ak gwo konsekans sou tout aktivite moun ann Ayiti. Poutan se pa gaz ki pa genyen se pito gang ame tankou chèf gwoup G9 la Jimmy Cherizier ki mande depan premye Minis Ariel Henry avan pou livrezon gaz ka fèt nan peyi a.

Sepandan atravè Potpawòl Mezon Blanch laisit Ozetazini, Jen Psaki, adaminstrasyon Biden nan pwomèt pou ede PNH, Polis Nasyonal Ayiti a asire sekirite kamyon livrezon gaz yo. Jen Psaki deklare, “Nap travay sou pwoblèm rate gaz la ann Ayiti e nap konsantre nou sou apui nou ka bay PNH la nan jefò pou sekirize pasaj kamyon livrezon gaz yo. Se yon defi. Men nou konnen se yon bagay kap pran yon titan.”

Dènye semèn sa yo, distribitè pwodui petwolye yo denonse vòl ki fè sou kamyon livrezon gaz yo atravè peyi a. Pou manifeste kont aksyon gang yo kap fè dappiyanp sou kamyon livrezon gaz yo, asosyasyon chofè pwodui petgwolye yo te anonse 3 joune grèv jeneral. Lari Pòtoprens ak plizyè vil pwovens te rete blanch. an menm tan tou plizyè lopital lanse yon sos pou yo pa fèmen pòt yo akoz rate gaz la nan peyi. Medya yo redui kantite lè pwogramsyon yo akoz rate gaz la tou. Chofè moto yo plenyen nan mikwo laprès sou konsekans rate gaz la genyen sou aktivite ekonomik yo.

Frantz Elbé Ranplase Leon Charles nan Tèt PNH la; Nouvo DG a Pwomèt pou Retabli Lòd ak Sekirite

Premye Minis tranzisyon an, Dr. Ariel Henry, opere yon chanjman enpòtan nan tèt enstitisyon Polis Nasyonal Ayiti, PNH, mèkredi 21 oktòb 2021 an, kote li nome e enstale enspekè jeneral Franzt Elbé nouvo kòmandan an chèf. Mesye Elbé ranplase Leon Charles ki te okipe pòs DGPNH la pandan anviwon 11 mwa e kèlke jou.

Chanjman sa a rive apre Leon Charles te oblije remèt demisyon l sou presyon ak revandikasyon plizyè lidè nan klas politik la ak òganizasyon popilè yo ki te mande revokasyon imedya l akoz ogmantasyon san paryèy fenomèn ensekirite a. Yo te fè konnen Leon Charles pap regle anyen serye nan tèt lapolis la. Mèt Andre Michel pòt pawòl Sektè Demokratik ak Popilè a te ale pi lwen pou di, ” Si Leon Charles pat ka bay “Prezidan Jovenel Moise sekirite, se pa pèp ayisyen li ka pwoteje.” Lidè SDP a ajoute, ” Tout tan Leon Charles DGPNH la se nan djakout nèg Lenbe na wè sekirite.” Lidè SDP a te bay premye Minis Ariel Henry yon iltimatòm jiska premye novanm pou l debarase PNH de Leon Charles.

Pandan ane 2021 fenomèn kidanpin nan vin ogmante plis ke jan l te ye ane pase yo. Dapre rapò òganizasyon dwa moun sou teren ann Ayiti, plis pase 300 moun sibi zak kidnapin pandna ane 2021 an. Gang ame ki kontwole majorite katye popilè yo nan Pòtoprens kidnape anviwon yon dizè sitwayen chak jou e pèsòn pa epanye, rich kou pòv e latriye sibi menm menas la e peye gwo ranson pou libète yo. Lapolis parèt trè fèb devan aksyon bandi yo. Jiska prezan 17 sitwayen ameriken toujou nan men gwoup gang 400 mawozo yo ki mande yon milyon dola sout tèt chak nan yo kòm ranson kont libète yo. Aksè nan sid peyi a vin pi difisil kote se lè bandi vle yo kite moun pase. Machann kap soti nan sid paka pote machandiz yo vin vann nan Pòtoprens. Kamyon gaz paka alfè distribisyon kabiran an pwovens san yo pa negosye ak bandi yo.

Anviwon yon dizèn polisye mouri nan operasyon echwe kont bandi ke PNH la mennen sou kòmandman Leon Charles. Jiskaprezan kadad polisye viktim sa yo rete nan men bandi ki mitile yo epi me te dife sou yo. Chanjman DGPNH la rive nan moman ekip gouvènmantal apre asasina Jovenel Moise la ap pare peyi a pou dewoulman eleksyon avan lontan yon fason pou renouvle pèsonèl politik la. Premye minis Ariel Henry mande nouvo deja a pou l mete l otravay imedyatman e san pèdi tan. Mesye Elbé ki rekonèt tach la pa pasil apre li vin drese yon tablo tris sou klima sekirite ak konsekans li sou aktivite ekonomik yo elatriye, pwomèt pou l travay pou retabli lòd ak sekerite nan peyi a.

Yon gwoup misyonè relije ameriken ki tap vizite Ayiti pou lapremyè fwa fè yon move kwazman sou wout Grantye, samdi 16 oktòb la. Gouwp gang san fwa ni lwa 400 mawozo kidnape misyonè yo ki te soti nan Ohio, isit Ozetazini. Anpil nan yo semanm menm fanmi e pami yo gen plizyè timoun. Misyonè yo te fèk fin vizite yon òfelina kote yo te sou wout pou te al depoze kèk nan yo nan Ayewopò Toussanit Louverture nan Pòtoprens lè asayan yo fè dapiyanp sou yo.

Lapolis ann Ayiti ki konfime nouvèl sou kidnapin nan poko di si bandi yo mande ranson pou libere misyonè yo. Otorite ayisyèn yo poko lokalize misyonè yo nonplis. Tout medya ameriken yo rapòte nouvèl la kote yo fè kwè administrasyon Biden lan di lap suiv sitiyasyon an deprè e yo an kominikasyon sere ak otorite nan Depatman Deta a ki okipe l de zafè sitwayen ameriken ki aletranje.

Jeneral Colin Powell Mouri Anba Konplikasyon Kovid-19

Ansyen sekretè Deta sou Prezidan Georges W. Bush, Colin Powell mouri alaj 84 tran anba konplikasyon enfeksyon kovid-19. Colin Powell se yon ansyen jeneral lame amerikèn. Li se tou yon veteran gè kont Vyetnam nan. Li te defann pozisyon Etazini nan Nasyon Zini kote li te vle konvenk lemond ke rejim bout di Irak la sou lobedyans prezidan Sadam Hussen tap devlope zam nikleyè. Li te regrèt entèvansyon li a paske prèv yo apre pat valab. Li te kite gwoup GOP Repibliken an pou l te al anbrase kandidati Barack Obama, premye nwa ameriken ki ta pral vin prezidan Lèzetazi Damerik. Li pat dakò ak jan pati Repibliken an tap jere dosye imigran yo. Jeneral e ansyen sekretè deta ameriken Powell te deja ap soufri ak lòt maladi ki ta pral vin rann sante l pi frajil ak enfeksyon Kovid-19 la. Mesye Powell te konplètman vaksinen kont kowonaviris la dapre fanmi li. Jereral ameriken beyn koni an mouri nan yon lopital miltè lendi 18 oktòb 2021 an kote li te etène depi plizyè jou. Jeneral Powell kite dèyè madanm li, Alma, ak 3 pitit Linda ak Annemarie (fi) e Micheal(gason). Jeneral Powell ak madanm li Alma te gen 59 van maryaj. Jeneral Powell te resevwa meday Prezidansyèl pou libète a (Presidential Medal of Freedom) 2 fwa.

Sekretè Defans ameriken Lloyd Austin ki tap rann omaj ak gwo potorik gason Colin Powell fè yon diskou emosynèl kote li deklare: ” Lemond antye pèdi youn nan pi gwo lidè li.”

Premye Dam ayisyen an Martine Moise Retounen an Ayiti

Premye Dam ayisyen an Martine Moise retounen an Ayiti pou l ka patisipe nan antèman mari l Prezidan Jovenel Moise. Prezidan Jovenel Moise mouri asasine lakay li nan Pèleren, Pòtoprens 7 jiyè pase a. Premye dam Martine Moise te soti blese nan okasyon atak yo te sibi jou sa a. Lapolis akize yon gwoup mèsenè kolonbyen pou atak la. Maritine Moise te al pran swen nan Florid. Li retounen samdi 17 jilyè a. Fineray Prezidan Moise ap chante nan Kap-Ayisyen 23 jiyè 2021.

Blog at WordPress.com.

Up ↑

%d bloggers like this: