Premye Dam ayisyen an Martine Moise Retounen an Ayiti

Premye Dam ayisyen an Martine Moise retounen an Ayiti pou l ka patisipe nan antèman mari l Prezidan Jovenel Moise. Prezidan Jovenel Moise mouri asasine lakay li nan Pèleren, Pòtoprens 7 jiyè pase a. Premye dam Martine Moise te soti blese nan okasyon atak yo te sibi jou sa a. Lapolis akize yon gwoup mèsenè kolonbyen pou atak la. Maritine Moise te al pran swen nan Florid. Li retounen samdi 17 jilyè a. Fineray Prezidan Moise ap chante nan Kap-Ayisyen 23 jiyè 2021.

Ayiti: Prezidan Jovenel Moise Mouri Asasine Anndan Lakay li nan Pèleren, Petyon-Vil

Prezidan ayisyen an, Jovenel Moise, mouri asasine anndan lakay nan Pèleren, Petyon-Vil, Ayiti, lannuit 7 pou louvri 8 jiyè 2021 an. Nouvèl ki soti ann Ayiti e ke tout medya nan lemond rapòte maten an fè konnen yon gwoup kòmando byen ame dezame sekrite prezidan Moise yo epi asasine chèf leta ayisyen an. Madam Prezidan an, Martine Moise blese grav nan atak la. Lòt medya ann Ayiti fè kwè premye dam ayisyen an ta mouri lopital.

Premye minis ai Claude Joseph konfime nouvèl la kote li di ke yon gwoup endividi non idantifye atake kay prezidan Moise ozanviwon inè (1am) di maten epi touye prezidan an. Dr. Claude Joseph pa di kòman prezidan an mouri si se ak bal oubyen lòt fason.

Premye Minis Claude Joseph kalifye asasina a kòm yon ak babarik e li mande tout moun rete kalm. Li di lapolis ak lame ap fè tout sa yo konnen pou asire sekirite peyi a. Tout mezi deja pran pou garanti kontinite leta a ak pou pwoteje nasyon an.

Kesyen anpil moun deja ap poze se kilès ki pral ranplase Prezidan Jovenel Moise sou pouvwa a? Jij Jean Wilner Morin, prezidan Nasyonal Asosyasyon jij yo di sou CNN ke li poko klè kilès ki pral pran plas prezidan Moise sou pouvwa a. Prezidan kou siprèm ayisyen an ta dwe pwochen moun ki pou ranplse Prezidan Moise, men misye te mouri anba maladi kovid 19 la. Pou Premye minis Claude Joseph ta pran pouvwa a li, palman an dwe ratifye l. Pou le moman se yon ti gwoup senatè ki rete an fonksyon kòm relika 46 lejislati a.

Prezidan Jovenel Moise te gen 53 zan. Li se yon komèsan ki te konn fè biznis ekspòte bannann nan peyi etranje avan l te vin prezidan. Pandan 3 zan pase yo Prezidan Jovenel Moise dirije peyi a anba gwo tansyon ak tibilans politik. Ak sipò Etazini, Nasyon Zini ak OEA, Prezidan Jovenel Moise te rete pou l pase yon ane sou pouvwa jiska fen manda li jann reklame l la 7 fevriye 2022. Sepandan Opozan politk yo fè kwè se yon pouvwa defakto Jovenel Moise ap dirije paske manda l fini depi 7 fevriye 2021.

Anbasad ameriken ann Ayiti fèmen pòt li akoz sitiyasyon sekirite a nan peyi pou mèkredi 8 jiyè 2021 an. Pòtpawòl Mezon Blanch la, Jen Psaki kalifye atak la kòm yon trajedi. Li fè konnen Lèzetazini pou kounye a ap ranmase enfòmasyon sou sak pase a. Nasyon Zini, OEA, ak Lagrand Bretay kondane zak asasinay ki fèt sou prezidan ayisyen an Jovenel Moise. Yo konseye tout moun kenbe kalm yo.

Dr. Ariel Henry ak Prensipal Misyon li Kòm Nouvo Premye Minis Peyi Dayiti

Prezidan Ayisyen an Jovenel Moise anonse li nome sitwayen Ariel Henry nan pòs premye minis peyi a. Dapre prezidan Moise nouvo premye minis Henry gen pou prensipal misyon, fòme yon gouvènman douvèti ki gen ladann tout fòs viv nasyon an, rezoud pwoblèm ensekirite a epi akonpaye KEP pou l rive reyalize eleksyon general yo ak referandòm sou konstitisyon an. Ariel Henry se yon neochirijyen ki etidye an Frans. Li ranplase Dr. Claude Joseph ki limenm pase sèlman 3 mwa nan tèt primati a, katye jeneral premye minis la. Dr. Joseph te antre nan ekip kouvènmantal la sou Premye Minis Joseph Jouthe kòm chèf diplomasi ayisyèn nan, pòs li te toujou kenbe pandan li tap jwe wòl premye minis ai. Joseph Jouthe li menm te demisyone nan mitan mwa davril pase a apre echek li di li konstate gouvènman li an fè nan rezoud pwoblèm ensekirite kap vale teren nan peyi a.

Nominasyon Ariel Henry kòm nouvo premye minis rejim PHTK a vini kèk jou apre OEA fin pibliye yon rapò sou kriz peyi Dayiti a. Ogònizasyon emisferik la te voye yon misyon ann Ayiti nan kòmansman mwa jen pase a. Apre 2 semèn misyon an redije yon rapò kote li fè kèk rekòmandasyon sou kriz la.

OEA mande prezidan ayisyen an Jovenel Moise pou l nome yon nouvo premye minis ak yon gouvènman tou nèf san pèdi tan, pran mezi pou etabli yon klima sekirite prese prese nan peyi a, epi kreye yon nouvo konsèy elektoral pwovizwa. Ekzekitif la dwe pran mezi sa yo pou reyalize eleksyon lejislatif ak prezidansyèl yo avan fen ane 2021 an selon rapò Oganizasyon Eta Ameriken yo.

Opozisyon politik la bò kote pal rejte ni rapò OEA ak tout nominasyon Dr. Ariel Henry nan tèt Primati a. Mèt Andre Michel, youn nan reprezantan Sektè Demokratik e polilè a, branch radikal opozisyon, di nan yon tweet:

“2 grenn Je nan Tèt pèp la kale lap Gade kiyès nan opozisyon an oubyen nan sosyete Sivil la Ki pral janbe Kadav Moun la Salin, Bèlè, Site Solèy, Delmas 32 pou al antre nan Gouvènman Kowabitasyon ak Jovenel Moise Ki gen Manda li fini Depi 7 Fevriye 2021. Kreyon pèp la pa gen gonm,” fend sitasyon.

Mèt Andre Michel voye jete tou rapò OEA sou krizlla. Li rejui deske opozisyon an pat chita ak delegasyon OEA ki te vin eseye mete aktè politk yo chita sou menm tab. Dr. Ariel Henry se 7èm premye minis sou Prezidan Joevenel Moise depi lè lidè PHTK pran pouvwa a nan ane 2017 pase a. Lòt lidè politk pi modere nan opoziyson pakwè Dr. Ariel Henry ap kapab rezoud pwoblèm sekirite a nan peyi a kote bandi ame kontinye fè san popilasyon an koule nan zòn Martissant, Cité Soleil, ak Delmas. Dèney sèn kanaj bandi yo fè nan Pòtoprens semèn pase se asasinay militan politik, jounalis ak polisye sendike san konte plizyè sitwayen pezib ki tap mennen aktivite kotidyen yo nan Delmas 32 ak nan Christ-Roi.

Rapò OEA a sou Kriz Ayiti a

Yon misyon politik Oganizasyon Eta Ameriken yo OEA, fè kèk rekòmandasyon a Ayiti, yon fason pou premye nasyon nwa Karayib la rive rezoud kriz politik lap travèse a. Oganizasyon emisferik la mande prezidan ayisyen an Jovenel Moise pou l nome yon nouvo premye minis ak yon gouvènman tou nèf san pèdi tan, pran mezi pou etabli yon klima sekirite prese prese nan peyi a epi kreye yon nouvo konsèy elektoral pwovizwa. Ekzekitif la dwe pran mezi sa yo pou reyalize eleksyon lejislatif ak prezidansyèl yo avan fen ane 2021 an.

OEA di gen espwa pou Ayiti rive rezoud kriz politik ak enstitsyonèl li a ak wòl òganizasyon emisferik la kapab jwe pou ede l fè sa. Yon kopi rapò sa a al jwenn Prezidan Jovenel Moise ak preprezantan peyi manm yo. Plizyè goup opozyon politk la rejete konklisyon 5 manm misyon OEA a ki te vizite Ayiti nan dat 8 a10 jen pase a.. Misyon an te chita pale ak diferan lidè politik ak manm sosyete sivil la.

OEA pa mansyone si gen nan lidè ayisyen yo ki te refize rankontre ak manm misyon li an. Misyon OEA a mande Prezdan Jovenel Moise kreye yon nouvo gouvènman avan mitan mwa jiyè 2021 a. Menm jan ak Etazini, OEA pa dakò ak lide pou Ayiti ranplase Prezidan Jovenel Moise sou pouvwa ak yon gouvènman pwovizwa avan dewoulman eleksyon yo.

Prezidan Jovenel Moise poko reyaji sou rapò misyon OEA a, menm si bri ap kouri nan Pòtoprens sou yon remaniman ministeryèl ki ta dwe fèt avan lontan pou ranplase tout minis nan gouvènman ai Dr. Claude Joseph la. Pandanstan Ayiti rete yon peyi frajil ak gwo defi ekomomik, sekirite e sosyal.

Ayiti: Jounalis Diego Charles ak Militant Antoinette Duclair Pami Plizyè Moun Ki Mouri Anba Bal Asasen

Jounalis Diego Charles ak militant Antoinette Duclair pami plizyè moun ki mouri an anba bal asasen nan Pòtoprens madi 29 pou louvri mèkredi 30 jen 2021 an. Sitwayen nan Pòtoprens leve mèkredi maten 30 jen an kote yo dekouvri plizyè abitan kap benyen nan san yo nan zòn Delmas 32 apre fin tire sou yo.

Jounalis Diego Charles ap travay pou radio Vision 2000 e militant se manm estrikti politik Matris Liberasyon, Yo tou 2 te gen 33 zan. Lanmò 2 jèn sa yo sekre peyi Dayiti. Medya yo ann Ayiti kondane asasinay 2 jèn yo ak lòt moun ki mouri anba bal bandi yo. Gouvènman ayisyen an kondane zak asasinay yo. Sepandan pa di ki aksyon yap pran pou mete yon fen nan ben de san kap fèt sou popilasyon an atravè peyi a kote lapolis parèt enpuisan devan aksyon malfra yo.  

Gran Pwen Aktyalite a pou Semèn 20 a 26 Jen 2021 an

1-Ayiti-Ensekirite: Batay ant Gang Ame yo nan Pòtoprens Gen Gwo Konsekans sou Fonksyonman Lopital yo.

Imaj: cmmb.org

2- Ayiti-Ensekirite: Junior Pinvin, jounalis Jounal Le Nouvelliste, Blese Grav Anba Bal Asasen Pandan Lap Antre Lakay li nan Pòtoprens.

3-Ayiti-Enekirite: Gwo Panik nan KwadèBoukè Samdi 26 Jen an. Gangs Ame ak Lapolis Twoke Kònn yo. Plizyè Machin Boule Devan yon Legliz Pwotestan.

4-Ayiti-Dwa Moun: RNDDH, Denonse 12 Masak Patizan Pouvwa PHTK a Fè sou Popilasyon Ayisyèn nan yon Peryòd 3 Zan, Soti 2018 pou Rive 2021.

5-Ayiti-Sante: 139 Nouvo Moun Enfekte ak Kowonaviris; 9 Lòt Pèdi Lavi yo Anba Maladi a.

6-Ayiti-Vaksen: Asosyasyon Famasyen Ayisyen, APH, Kalifye de Iresponsab Desizyon Ministè Sante Piblik,MSPP, Pran pou Envite Sektè Prive a Enpòte Vaksen Anti-Kowonaviris.

7-Ansyen Prezidan Jean Bertrand Aristide Pa Gen Kowonavirs. Se pou Lòt Maladi lidè Lavalas la Ap Pran Swen nan Peyi Cuba.

8-Yon Aksidan Sikilasyon sou Wout Nasyonal Nimewo 3, Mòn Kabrit, Lakoz Lamò yon Chofè Taptap.

9- Nan Komin Tabare, yon Kout Loraj Lakoz 2 Moun Mouri, yon Lòt Blese Grav.

8-Isit Ozetazini Youn nan Pwen Kap Domine Aktyalie a Se Gwo Bilding ki Tonbe Plat Atè a nan Miam kote Anpil nan VIktim yo Se Sitwayen Etranje Dapre Senatè Repibliken, Marco Rubio.

9-Lòt pwen nan Aktyalite a Ozetazini, Se Kondanasyon Polizye Blank, Derek Chauvin Ki Te Mete Pyel Sou Kou Sitwen Nwa, George Floyd Jiskaske l Te Pete Fyèl li. Ebyen, Lajisitis Jwenn ansyen Polisye Chauvin Koupab E li Pral Pase yon BonTibout Tan ap Reflechi Dèyè Bawo.

Dosye Dorval; Ansyen PM Joseph Jouthe Di Lap Reponn Prezan Si Lajistis Rele l

Ansyen premye Minis Joseph Jouthe soti nan silans li, 3 mwa apre l te fin remèt demisyon l kòm, chèf gouvènman nan akoz feblès nan zafè sekrite peyi a. Ansyen PM nan fè konnen li dispoze reponn kesyon lajistis sou dosye asasina ansyen Dwayen Bawo Pòtoprens la Monferrier Dorval si lajisits ta vle pase ti bè bò bouch li.

Nan yon nòt sekretè prive ansyen premye minis rejim PHTK a pibliye sou kont Twitter li, moun ka li, “Nan kad afè Met Dorval la, Mesye Jouthe antan ke sitwayen ki respekte lwa peyi l, rete disponib nenpòt lè jij enstriksyon Renold Regis ta rele l nan kabinè enstriksyon. Li afime bòn volonte li pou kowopere ak lajistis. Mr. Jouthe espere ke pwosedi legal yo respekte nan sans sa a.”

Ayiti: Prezidan Jovenel Moise Tap Pase yon Bon Moman nan Peyi Tirki Pandan Gang Ame G9 Asyeje Plizyè Zòn nan Kapital la

Pandan Ayiti ap travèse yon move moman anba men gwoup gang ame yo, Prezidan Jovenel Moise sanble tap pase yon bon moman nan peyi Triki. Nan yon mesaj sou kont Twitter, Prezidan Jovenel Moise fè elòj de rankont li ak Prezidan Tirk la, Recep Tayyip Erdoğan, kote li di li te byen kontan patisipe nan fowòm sou diplomasi entènasyonal la nan Antalya, peyi Tirki. Fowòm sa ki gen awè ak inovasyon nouvèl èr, nouvè apwoch, se yon okazyon pou Ayiti devlope nouvèl kowoperasyon ak sèten peyi nan lemond, dapre prezidan ayisyen an.

Prezidan Moise di li te pwofite okazyon an pou diskite ak Prezidan Tirk la, Recep Tayyip Erdoğan, sou devloman nan zafè kouran elektrik, sekirite ak envestisman etranje. Prezidan Jovenel Moise te akonpaye ak madam li Martine Moise pandan rankont sou diplomasi a nan peyi Tirki. Nan moman Prezidan ayisyen an te nan Tirki, premye minis ai li a Dr. Claude Joseph te nan New York kote li tap mete yon diskou atè devan konsèy sekirite Nasyon Zini an sou zafè eleksyon gouvènman an vle reyalize pandan fen ane 2021 an.

Pandan 2 gwo chèf pouvwa egzektif la te aletranje, gwoup gang G9 tap bay demonstrasyon nan Pòtoprens anba bouch lapolis. “G9 e alye, manyen youn manyen tout” montre fòs ponyèt yo ak gwo zam fann fwa nan men yo. Pou pi piti yo touye yon polisye CIMO e blese yon lòt nan yon dappiyanp yo fè sou yon patwouy woutin PNH nan Delmas 6. Yo piye mache Ti-Tony e latriye.

Kesyon anpil moun ap poze se èske demonstrasyon sa yo se pou entimide opozisyon an, oubyen èskè pouvwa egzekitf la divòse ak G9? Sepandan lidè dwa zini Pierre Esperence kwè 2 gwoup sa yo twò damou pou yo ta kraze yon kite sa konsa. Pierre Esperence nan plizyè rapò, RNDDH mansyone ke gwoup gang G9 la se alye pouvwa ak pati politik PHTK a. Yo responsab plizyè masak sou popilasyon sivil la dapre rapò RNDDH la.

Ayiti: Bandi Ame Sèl Kòk Chante; Lapolis Di Li an Eta Dalèt

Gang ame yo montre se yo ki gen kontwòl zòn metwopolitèn nan Pòtoprens. Gang yo se sèl kòk chante. Vandredi 18 jen an yon gwoup nèg ame yo idantifye ki asosye ak G9 e alye, mache ak gwo zam nan men yo nan zòn ba Delmas, Kafou aviyasyon, Chansrèl, Site Militè, Wout Ayewopò, kote yo fòse biznis fèmen pòt yo anba gwo kout zam otomatik.

Bandi yo fè demonstrasyon sa a apre plizyè inite espesyalize lapolis te mennen yon operasyon nan Delmas 6 kote yo tap chache tankou chen fou Jimmy Cherizier alyas BBQ, yon ansyen polisye yo rann responsab lanmò yon polisye CIMO nan jedi 17 jen pase a.

Anba woulo konpresè bandi yo, Mache Ti- Tony pase yon move moman, kote pèp souvren pote ale tout sa l te genyen kòm pwovizyon. Lapolis te sanble absan nan moman an. Nan yon video kap sikile sou entènèt moun kapab wè bandi yo ki ak gwo zam, kè kal andan mache Ti-Tony an. Pwopriyetè Mache Ti-Tony an, Anthony Bennett, ki tap reyaji sou piyaj yo fè nan biznis li an di li pap dekouraje. Lap kontinye travay pi rèd pase li kwè nan travay di.

Otorite polisyè yo di yo ann eta dalèt pou rive mete bandi yo andewout. Sepandan lidè òganizasyon dwa moun, RNDDH, Pierre Esperence, fè kwè bandi yo an konivans ak pouvwa a anplas la. Se sa ki rann lapolis ineifikas nan operasyon lap mennen kont yo. Nouvèl yo fè kwè Mr. Esperence, akoz revelasyon l yo ta ap resevwa menas nan men bandi yo. Plizyè vwa nan kominote entènasyonal la mande gouvènman an pran mezi pou asire sekirite lidè dwa zimen an, Pierre Esperence.

Blog at WordPress.com.

Up ↑

%d bloggers like this: